Vaivakawn in ruihhlo do chungchangah Vantlang Inkhawm nei

by News Editor

Tualchhung News

ZORAM TODAY| Aizawl 23rd May, 2024 (Thurs): Zanin dar 7:30 khan Vaivakawn Local Council leh tlawmngai pawl (all NGO) bultumin Ruihhlo do beihpui thlak vantlang inkhawm Vaivakawn YMA Hall ah an nei.

He hun hi R. Zothanmawia, Vaivakawn LC Chairman chuan kaihhruaiin Vaivakawn veng chhungkaw tin aṭangin aiawh pakhat ṭheuh an kal. YMA, Vaivakawn Siamṭha Pawl (VSP) hruaitute leh mipui lam aṭangin ruihhlo zuar leh ruihhlo ti te thian thianghlim tura hmalakna leh tanrual dan tur hrang hrangte an sawiho bawk.

Zanin Vantlang Inkhawma tel te hian hetiangin resolution an pass nghal bawk:

1) Vaivakawn hi zu leh ruihhlo zuar awm lohna vêng nuama siam tûrin lungrual taka theihtâwpa hmalâk kan rem ti a, kan hlawhtlin hma chuan beihpui kan thlak dawn a ni. Khawtlang tangrual hmalâkna ti thuanawp zawnga thiltih emaw, dodâlna emaw a awm a nih chuan khawtlangin a tûl ang zêlin a hmachhawn ang.

2) Veng chhunga awm mêk leh vêng pawn atanga zu leh ruihhlo zuar leh anmahni dawr tûra lo kal thînte inthiarfihlim tûrin kan chah a. Ti lui leh bânsan duh lo an awm chuan khawtlang hmalâkna an hmachhawn a ngai dawn tih kan hriattir a ni.

3) Mizoram sorkar-a Excise & Narcotics Department-in Vaivakawn leh a chhehvêla zu leh ruihhlo hluar lutuk tirêm tûra beihpui thlâk a tum thu a puang hi lawmawm kan ti a. Sorkar thupuan hi a hlawhtlin ngei theihnan a tâwp thlengin Vaivakawn khawtlang chuan kan thlawp tlat dawn a ni.